Het meer, de boot, de taxibus en t geduld

Eindelijk was t zover. De boottocht op ‘t Oldambtmeer was al n poar moal overgoan vanwege de hitte. Mor op dinsdag 20 september was het mooi zunneg weer en de temperatuur was aangenoam. Om ain uur wazzen we d’r hailndaal kloar veur. Vieftien bewoners onder begelaaiden van Mientje, Sientje, Lientje, Trientje en Dientje zolln mit op raize goan. Mit auto, mor veur tweie kwam ain buske van Connexxion. Want dei zatten in rolstouln. Buske was mooi op tied chauffeur was n oardege kerel. Hai zörgde derveur, dat baide rolstouln mit lift omhoog gingen en loater op de ploatse stevig vast zet wurdn. Veiligheidsraime om en mit begelaidster Mientje op weg noar de hoaven van t Oldambtmeer. Doar wazzen kapitein en assistente al aanwezig en kon elk aan boord goan. Dat ging nait zómor, was best spannend hur. Minsen mit, rollator mit en de rolstouln mit de inzittenden. Dat was wat stoerder. Ain rolstoule was te braid veur de lift, dei t ding omdele loatn mos. Hou nou? Smale rolstoule eerst, de inzittende op stoule aan boord, stoule weerom, inzittende van te braide stoule doar oet en in de smalere, zo mit lift omdele en op ain mooi plekje zet. Braide stoule bleef op ‘t dek. Dou elkenain aan boord was kon de raize begunnen. Gezellig aan toaveltjes konden we over ‘t wotter oetkiekn. Wie kreegn kovvie of thee mit cake. De kapitein vertelde wat d’r aal te zain was. Nait allenneg wotter mor ook zwoanen, eenden en hoezen. Dure hoezen, in de Blauwestad. De kapitein wos zulfs wel of d’r woonden. Rieke Iuu mit boten in bootnhoezen. Zulfs aine dij dat ding mit ain lift noar boovn toakelde. In ‘t Havenkwartier stoan klaine hoezen, dij aan mekoar zaten en aalmoal verschillend wazzen. Leek wel op hoezen in Volendam mor mit meer kleur.. Mor in Blauwestad was gain winkel, gain schoule, wel n restaurant en muggn.

Boot ging onder de Pieter Smit brugge deur. De laangste fiets en wandelbrugge in Europa. Achthonderd meter laank. En dou weerom. Richting hoavn, woar wie ook begonn wazzen. Tegen vaar uur wazzen wie doar. Elk weer van boord natuurlek. Kaalm aan. Want ook de inzittenden van de rolstoulen mozzen weer ombatterijd wordn. Auto’s wurn weer vuld mit bewoners, dij wel weer noar de A-Börg hin wolln. Zo ook de bewoners, dei mit rolstouln kommn wazzen. Mor buske was d’r nog nait. Geft niks, mooi weer, plekje in de zunne mit zicht op hoaven. Eevm wachten. Toch mor bellen of buske besteld was. Joa hur.... En om eevm veur haalf vieve kwam buske. Mor dizze chauffeur was n aandere. Hai wol mor 1 rolstoule mitnemen. Wat nou te doun? Lopend noar de A-Borg was toch n hail ende .. Chauffeur beide mit kantoor. Joa man, tweie en Mientje mochten mit. Ain stoule dr in, mit lift omhoog, vast mit de gordels. Dou stoule nummer 2. Mit lift omhoog, mor vast mit gordels wol nait. In haile bus gain verlengen veur dat ding te vinden. En doar zat onze bewoonster mit gespe in haand. Te gevoarlek. Chauffeur belt mor weer noar kantoor. Woar wie al baange veur wazzen gebeurde. Baide rolstouln dr weer oet. Dr mos n aandere bus kommn. Mientje zette baide rolstouln mit bewoonsters mor weer op ain mooi plekje hin mit oetkiek op bootjes en meer.

Lientje, Trientje en Dientje haddn auto’s al volpakt mit bewoners en raaisden of noar de A-Borg. Sientje bleef mit de inzittenden van heur auto wachten tot aandere bus kwam. Wat dou je in tussentied? Zingen dat t busje zó komt. Vertellen over vrouger. Over windsurfen en nog veul meer. Mor toch kroop tied om. lJsco’s wazzen dr nait meer te koop, zee Sientje. Din mor kovvie. Mor van drinken mos je noar de wc. En dij was dicht. Eindelijk, zo tegen haalf zesse kwam dr n busje aan. Dizze chauffeur mog ons mitnemen. Haile programma weer ofdraaid. Op lift, in busje. Vast mit gordels. Joa, aalbaide laank genog. Eindelijk weer noar A-Borg. Noar de wc en dou direct aan toavel. Eten ston al laank te wachtn. Zo’n raize mit buske en boot is mooi, mor dit duurde net wat te laank…